Yevgeny Prigozhin, eigandi Wagnerhópsins, málaliðafyrirtækis sem berst við hlið rússneska hersins í Úkraínu, færir sig sífellt upp á skaftið og gerir djarfari árásir á rússnesk stjórnvöld.

Hann ræðst nú beint á stjórn Vladímír Pútíns og segir að innan stjórnarinnar séu aðilar sem vilji að Rússar tapi stríðinu í Úkraínu.

Þetta kemur fram í daglegri stöðufærslu bandarísku hugveitunnar Institute for the Study of War (ISW) sem segir að Prigozhin hafi kvartað undan að yfirvöld hafi ekki lokað fyrir YouTube í Rússlandi og að það sé andstaða við það í hinni pólitísku umræðu.

Hann segir að ástæðan sé að ef lokað verður fyrir YouTube muni það grafa undan tilraunum svikaranna til að endurvekja samskipti og samband Rússlands og Bandaríkjanna eftir að Rússar tapa stríðinu í Úkraínu.

ISW segir að búið sé að koma upp spjallrás í Rússlandi þar sem Prigozhin og aðrir þekktir rússneskir þjóðernissinnar á borð við Igor Girkin geta gagnrýnt Pútín án þess að eiga á hættu að verða refsað fyrir það.

Prigozhin er oft nefndur Kokkur Pútíns vegna ábatasamra samninga sem Pútín færði honum um að sjá um að útvega rússneska hernum mat.