Stórstjarnan unga, Billie Eilish, hefur farið fram á nálgunarbann gegn 39 ára gömlum karlmanni sem er grunaður um að hafa brotist inn til foreldra hennar í Los Angeles.

Nálgunarbannið myndi einnig ná til bróður Billie, Finneas O’Connel sem og til foreldra þeirra.

Umrætt atvik átti sér stað þann 4. janúar. Maðurinn, Christopher Anderson, braust inn til foreldra Billie, til að freista þess að fá að hitta þar söngkonuna og játa henni ást sína.

Faðir Billie greinir frá því að Christopher þessi hafi ítrekað reynt að nálgast heimili þeirra í desember. Hafi hann skilið eftir blóm og bréf til Billie þar sem hann játaði ást sína og sagðist ekki þrá neitt heitar heldur en að fá að hitta hana.

Billie hefur gefið út að þetta atvik hafi valdið henni mikilli vanlíðan og kvíða. Í yfirlýsingu sagði hún:

„Því miður er þetta ekki í fyrsta sinn sem ókunnugur aðili hefur reynt að setja sig í samband við fjölskyldu mína og mig með því að sitja um fyrir okkur fyrir utan fjölskylduheimilið og koma með allt frá ástaryfirlýsingum yfir í hótanir um ofbeldi gegn mér. 

Hins vegar valda öll þessi skipti, þar með talið þetta, mér verulegum kvíða, ótta og uppnámi gagnvart mínu eigin öryggi sem og gagnvart öryggi föður míns, móður og bróður.“

Bætti hún við að hún teldi það ekki öruggt fyrir sig að fara á æskuheimilið af ótta við ágang eltihrella.

Christopher Anderson er sem stendur í haldi lögreglu.