Þetta kom fram þegar dánardómsstjóri tók málið nýlega fyrir. Sky News segir að rannsókn lögreglunnar hafi ekki varpað ljósi á hver dánarorsök Yasutake var. Hún bjó með móður sinni og systkinum í Helmsley í North Yorkshire.
Það var í september 2018 sem lyfsalinn tilkynnti lögreglunni um grunsemdir sínar í kjölfar þess að systkini Yasutak, sem eru 51 og 56 ára, komu ítrekað til að kaupa sótthreinsispritt.
Lík Yasutak var á dýnu á gólfinu og var sæng breidd yfir það. Hún var 49 ára þegar hún lést. Ljóst var að hún hafði verið látin vikum saman.
En fjölskylda hennar hélt að hún væri á lífi. Nichola Holden, sem stýrði rannsókn lögreglunnar, sagði fyrir dómi að fjölskyldan hefði verið sannfærð um að Yasutak væri lifandi og hafi haldið fast í þá trú í marga mánuði eftir að lögreglan fann lík hennar.
Systkini hennar og móðir, sem er áttræð, voru kærð fyrir ósæmilega umgengni við lík og að hafa komið í veg fyrir jarðsetningu þess. Fallið var frá kærunni þegar lögreglan komst að því að fjölskyldan, sem er frá Japan, þjáist af sjaldgæfum andlegum veikindum.
Réttarmeinafræðingur sagði að ekkert hafi komið fram við rannsókn sem bendi til að einhver utanaðkomandi hafi átt hlut að andláti Yasutak. Hún var hæfileikarík og fékk á sínum tíma styrk til að stunda nám við Cambridge háskólann.
Hún vann ekki eftir að hún lauk námi og bjó með fjölskyldu sinni í Helmsley næstu 20 árin, eða þar til hún lést.
Lögmaður fjölskyldunnar sagði fyrir dómi að hún væri „úr takti við umheiminn og einangruð“. Meira að segja þegar notast var við túlk í samræðum við fjölskylduna hafi það verið erfitt því hún tali sína eigin málýsku.
Holden sagði að fjölskyldan hafi ekki haft neinar leiðir til að hafa sambandi við umheiminn og hafi ekki átt útvarp né sjónvarp.
