Benedikt Bóas Hinriksson, blaðamaður Fréttablaðsins og stjórnandi Íþróttavikunnar með Benna Bó á Hringbraut, sendir Atla Fannari Bjarkasyni, samfélagsmiðlastjóra RÚV, væna pillu í pistli sem birtist í Fréttablaðinu í morgun.

Atli Fannar var á dögunum gestur í hlaðvarpinu Dr. Football en þar furðaði hann sig á lítilli viðveru Handknattleikssambands Íslands (HSÍ) á samfélagsmiðlum. „Samfélagsmiðlastjóri RÚV, Atli Fannar Bjarkason, fór mikinn í Dr. Football þar sem hann fann HSÍ nánast allt til foráttu varðandi samfélagsmiðlakunnáttu sam- bandsins. Skildi til dæmis ekki af hverju HSÍ væri ekki að græða peninga á samfélagsmiðlum,“ segir Benedikt í upphafi pistilsins.

„Atli sagði í þættinum frá sínum eigin verkum á RÚV og hvað RÚV væri frábært á öllum samfélagsmiðlum. Galdurinn, samkvæmt Atla, við að vera frábær á samfélagsmiðlum er að taka það sem er gott á dagskrá RÚV og setja á samfélagsmiðla. Það væru nú allir töfrarnir. Hvort sem það væru hlutar af Áramótaskaupinu, eða uppistandi Sóla Hólm og horfa á lækin hrúgast inn.“

Benedikt bendir á að RÚV sé með gífurlegt forskot þegar kemur að verkefnum eins og að birta efni á samfélagsmiðlum. „Eins og RÚV-urum er tamt er lítill skilningur á öðru umhverfi en að fá gefins milljarða,“ segir hann.

„Ef HSÍ fengi sömu milljarða gefins á ári og RÚV væri pottþétt samfélagsmiðlastjóri innan HSÍ. Það væri jafnvel hægt að ráða heila deild og sérstakan starfsmann til að sinna TikTok eins og á RÚV. HSÍ fær því miður ekki alla þessa milljarða og getur því ekki verið að klippa efni í eina klippu á samfélagsmiðlum. Það að hlusta á RÚV-ara með sína áhyggjulausu milljarða í vasanum gera grín að hvað HSÍ sé lélegt á samfélagsmiðlum er sönnun þess að ríkismiðillinn er á villigötum.“