Henry Birgir Gunnarsson settist í settið í Íþróttavikunni með Benna Bó sem sýnd er á Hringbraut alla föstudaga. Þar var einnig Hörður Snævar Jónsson, fréttastjóri íþróttafrétta á Torgi.

Skýrsla Grétars Rafns Steinssonar sem hann gerði á sex mánaða tíð sinni hjá KSÍ um starf sambandsins hefur verið á allra vörum.

Hörður gagnrýnir viðbrögð KSÍ við birtingu hennar.

„Mér finnst viðbrögð KSÍ við að þessi skýrsla hafi farið í lofið lélegur varnarleikur. Skýrslan hafði legið inn á borði formanns og framkvæmdastjóra í að verða sex mánuði og safnað ryki þegar Jörundur fær hana í hendurnar í nóvember og fer að skoða þetta.

Það er enginn að spá í neinu. Það er enginn að halda því fram að allt sem Grétar skrifi sé heilagur sannleikur en allavega að KSÍ hafi stundum þor í það að ræða hlutina, ekki bara henda þessu niður. Grétar var ráðinn í starfið með einhverjum tilgangi,“ segir Hörður.

„Mér fannst verst þegar þau fara að kalla þetta greinagerð eða hugleiðingar. Þetta er ekkert annað en skýrsla frá sérfræðingi um starfið hjá KSÍ. KSÍ á að hafa vitsmuni í það að nýta þetta. Það þarf ekki að nota allt, allavega ræða þetta.“

Henry tók í sama streng. „Vertu flottur og auðmjúkur gegn þessu, ekki gera lítið úr þessu.“

„Fótboltinn á Íslandi er ekki það vel staddur að við getum tekið svona plagg og sturtað því í klósettið,“ segir Hörður að endingu.