Guðlaugur Victor var á mála hjá New York Red Bulls árið 2012. Þar var einnig Arsenal-goðsögnin Henry.
„Hann var algjör fáviti en vildi bara vinna, þó svo að hann hafi verið kominn í MLS. Ég virði það í dag,“ segir Guðlaugur Victor um Henry.
„Þá var ég 21 árs, engan veginn með einbeitinguna í lagi, var ekkert að einbeita mér að fótbolta og ég fór bara í taugarnar á honum. Ég var bara krakkaskítur, alltaf að djamma og var bara lélegur.“
Í eitt skiptið bað Guðlaugur Victor Henry um að vera betri við sig.
„Ég settist niður með honum og bað hann bara um að sýna mér smá ást. Ég var að fara að spila með honum um kvöldið og átti að byrja, var ógeðslega stressaður. Hann sagði mér bara að þetta virkaði ekki svona.
Við töpuðum leiknum 4-1 og ég held ég hafi ekki byrjað leik eftir þetta. Það var eitt skipti þar sem ég var að svara honum. Ég hafði enga innistæðu fyrir því að svara honum eða rífa kjaft. Að gæinn hafi ekki þolað mig og engan veginn virt mig er bara sanngjarnt.“
Það voru ekki allir í liðinu sem gátu unnið á stiginu sem Henry krafðist.
„Menn áttu erfitt með að höndla hann. Það átti allt að vera fullkomið alltaf. Ég myndi elska að spila með honum í dag. Eftir að hafa verið í Þýskalandi svona lengi og í Sviss þá breyttist hugarfarið mitt.
Ég var þarna en var ekki þarna. Ég var meira inni á næturklúbbum en vellinum. Það var bara staðan.“
Eftir að Guðlaugur Victor hafði svarað Henry í eitt skiptið tók Frakkinn hann fyrir.
„Það voru svona tvær vikur þar sem hann tók mig fyrir. Ég hafði svarað honum og hann tekið mig á teppið. Inni í klefa og á æfingasvæðinu lagði hann mig bara í einelti. Ég var bara mjög lítill í mér. Hann vildi bara að ég lærði þetta á erfiða mátann.“
Henry tók sig hins vegar til og bauð Guðlaugi Victori heim til sín að horfa á vináttulandsleik Íslands og Frakklands árið 2012.
„Hann bauð mér að koma heim til sín að horfa á leikinn með sér. Þá sat ég með honum uppi í sófa að horfa á leikinn. Ég sagði ekki orð ég var svo stressaður. Þá sýndi hann mér smá ást.
Ég hef hitt hann nokkrum sinnum síðan og þá höfum við átt mjög fín spjöll.“
