Teresa Hanson, 54 ára gömul amma og hárgreiðslukona frá þorpinu West Cowick á Englandi, er sökuð um að hafa myrt eiginmann sinn, Paul Hanson, á heimili þeirra milli jóla og nýárs. Hún er sögð hafa stungið eiginmann sinn, sem var einnig 54 ára, en þau höfðu verið gift í 34 ár.

Í grein The Sun um málið kemur fram að amman hafi verið handtekin í kjölfar árásarinnar og að farið hafi verið með eiginmann hennar á sjúkrahús. Ekki náðist að bjarga eiginmanninum en hann var úrskurðaður látinn skömmu eftir að hann kom á sjúkrahúsið.

Nokkrum dögum fyrir morðið höfðu þau Teresa og Paul eytt jólunum með dóttur sinni Sherri og barnabörnunum sínum. Í mynd sem Sherri birti á samfélagsmiðlinum Facebook má sjá hjónin sitja við matarborðið. „Við áttum frábæran dag með fjölskyldunni,“ skrifaði Sherri með myndunum.

Teresa fór fyrir dóm síðastliðinn þriðjudag og átti sér enga málsvörn er lesin var yfir henni ákæran. Raunar talaði hún ekkert á meðan á þessu stóð nema þegar hún staðfesti nafnið sitt. Hún þarf að fara aftur fyrir dóm í júní á þessu ári en dómarinn John Thackray segir að réttarhöldin eigi eftir að taka 5 daga. Hann benti ömmunni á mikilvægi þess að mæta í réttarhöldin því málið verður tekið til meðferðar hvort sem hún verður á staðnum eða ekki.