Rússneskir hermenn og málaliðar á vegum Wagner-hópsins halda áfram að sækja að úkraínskum hersveitum í Bakhmut. En Rússana skortir stuðning og ólíklegt er að þeir nái að brjóta varnir Úkraínumanna á bak aftur á næstunni.

Þetta er mat breska varnarmálaráðuneytisins en það birtir dagleg stöðuskýrslu yfir gang stríðsins.

Ráðuneytið segir að árásum rússneskra fótgönguliða hafi fjölgað í desember en þessar aðgerðir fái ekki mikinn stuðning frá öðrum deildum hersins og mannfallið hafi verið mikið, bæði hjá Rússum og Úkraínumönnum.

Segir ráðuneytið ólíklegt að Rússum takist að brjóta varnir Úkraínumanna á bak aftur á næstunni.

Latest Defence Intelligence update on the situation in Ukraine – 03 January 2023

Find out more about the UK government's response: https://t.co/dFqO3TLWgZ

🇺🇦 #StandWithUkraine 🇺🇦 pic.twitter.com/1kwYmKRUlw

— Ministry of Defence 🇬🇧 (@DefenceHQ) January 3, 2023

Áður hefur komið fram að Rússar senda stóra hópa hermanna fram gegn varnarlínum Úkraínu og þar með út í opinn dauðann. Hefur þessum hernaðaraðgerðum verið líkt við það sem átti sér stað í síðari heimsstyrjöldinni.

„Hlutverk þeirra er að sækja fram gegn okkur og neyða okkur til að skjóta á þá til að við komum upp um staðsetningu okkar. Í kjölfarið skjóta þeir úr fallbyssum eða senda bardagareynda hermenn gegn okkur,“ sagði Sergiy, úkraínskur major, í samtali við AFP.

Úkraínumenn hafa sent liðsstyrk til Bakhmut síðustu 10 daga og árásum Rússa hefur fækkað þar síðan um miðjan desember.