Harry prins segist harma stöðu mála varðandi ágreining sinn og Meghan Markle, eiginkonu hans, við bresku konungsfjölskylduna. Í morgun birtust stiklur af viðtölum sem prinsinn veitti í tilefni af útgáfu bókar hans, Spare, í næstu viku þar sem hann segist harma stöðu mála. „Ég myndi vilja fá bróður minn og föður tilbaka,“ segir Harry í viðtalinu og sakar bresku konungsfjölskylduna um að hafa ekki sýnt neitt frumkvæði né vilja til að lægja öldurnar.

„Ég þarf fjölskyldu, ekki stofnun,“ segir prinsinn ennfremur og segir að ágreiningurinn hafi aldrei þurft að enda í þeim klofningi sem orðið hefur milli hans og fjölskyldunnar. Segir hann að afstaða bresku konungsfjölskyldunnar hafi verið sú að láta líta út fyrir að Harry og Meghan væru sökudólgarnir fyrir klofningum.

Talsverður titringur er vegna viðtalsins, ekki síður en bókarinnar, en í stiklu þess er ýjað að því að Harry muni fara með ítarlegri hætti en oft áður yfir ágreining sinn við konungsfjölskylduna og hvernig það atvikaðist að hann ákvað að segja sig frá opinberum skyldum sínum.

Í viðtali við Anderson Cooper í þættinum 60 minutes spyr fjölmiðlamaðurinn Harry af hverju hann hafi ekki ákveðið að ræða ósættið innan fjölskyldunnar í stað þess að gera það fyrir opnum tjöldum. Svar prinsinn er á þá leið að það hafi hann reynt ítrekað en að í hvert sinn hafi áhyggjum hans verið lekið í fjölmiðla og þeim snúið upp í fréttir sem voru beinlínis rangar og skaðlegar fyrir hann og fjölskyldu hans.

Segir hann almannatenglar Buckinghamhallar hafi lekið fréttum sem taldar voru henta konungsfjölskyldunni í fjölmiðla. Slíkar fréttir hafi verið skrifaðar samkvæmt heimildum og neðst í þeim hafi verið skrifað að óskað hefði verið eftir viðbrögðum frá höllinni.

Viðtölin eru talin staðfesta að Harry muni fara ofan í saumana á rifrildi sínu við eldri bróður sinn, Vilhjálm Bretaprins.