Lögreglan á höfuðborgarsvæðinu óskar eftir vitnum að umferðarslysi sem varð á Höfðabakka í Reykjavík aðfaranótt laugardagsins 10. desember síðastliðinn en þar var ekið á gangandi vegfaranda sem lést. Þetta kemur fram í færslu sem birt var á Facebook-síðu lögreglunnar í dag.
Tilkynning um slysið barst lögreglunni klukkan 00:33 þann 10. desember, en það varð á Höfðabakka, nálægt Árbæjarsafni.
Lögreglan á höfuðborgarsvæðinu og rannsóknarnefnd samgönguslysa rannsaka tildrög slyssins. Þau sem urðu vitni að slysinu eru vinsamlegast beðin um að hafa samband við lögregluna í síma 444-1000, en einnig má senda upplýsingar í tölvupósti á netfangið 1710@lrh.is
Vegfarandinn sem lést í slysinu var karlmaður á fimmtugsaldri. Hann var fluttur á Landspítalann í kjölfar slyssins en lést þar um nóttina. Lokað var fyrir umferð um Höfðabakka, á milli Bæjarháls og Stekkjarbakka, á meðan unnið var á vettvangi.
