Hin 22 ára gamla Maria Carolina Do Nascimento Migel var að keyra bíl sinn í bænum Edgware á Englandi þegar um klukkan 15:45 síðastliðinn jóladag þegar hún lenti í árekstri. Hringt var í sjúkrabíl sem mætti á svæðið en ekki tókst að halda lífi í Migel sem lést á vettvangi. Karlmaður sem keyrði annan bíl sem lenti í árekstrinum fékk höfuðmeiðsl en þau voru þó ekki alvarleg. The Sun fjallaði um málið.

Tveir karlmenn, annar 29 ára og hinn 21 árs, voru handteknir síðar um daginn þar sem þeir voru grunaðir um að valda dauða með glæfralegum akstri en auk þess voru þeir grunaðir um að flýja vettvang árekstursins á fæti. Annar 32 ára karlmaður var svo handtekinn daginn eftir, grunaður um sömu brot og hinir mennirnir tveir. Allir þrír mennirnir eru nú lausir úr haldi lögreglu gegn tryggingu.

Lögreglan á svæðinu segir að áður en áreksturinn varð hafi hún beðið ökumann um að stöðva bifreið sína. Ökumaðurinn óhlýðnaðist lögreglunni og keyrði áfram í burtu en lögreglan ákvað ekki að elta hann. Skömmu síðar var bifreið þessa ökumanns hluti af árekstrinum. Lögreglan óskar nú eftir upplýsingum frá almenningi á svæðinu og freistar hún þess að einhver gæti mögulega hafa verið með myndavél í gangi í bílnum sínum. Upptökur úr slíkri myndavél gæti hjálpað með rannsókn málsins.