Svona hefst leiðari Fréttablaðsins í dag en hann ber fyrirsögnina „Aurasálir“ og er skrifaður af Garðari Erni Úlfarssyni.
Hann segir að það geti vel verið rétt að nafni guðs sé ekki hampað daglega í opinberri umræðu hér á landi en það þýði ekki að þjóðin sé guðlaus. Þjóðkirkjan sé langstærsta trúfélag landsins og venjulega langmest áberandi af trúfélögum landsins.
„Því miður er það þó yfirleitt ekki sakir vel heppnaðrar útbreiðslu fagnaðarerindisins heldur fremur vegna væringa, illinda og jafnvel hreinna ofbeldisverka innan kirkjunnar vébanda. Mikil er ábyrgð þjóðkirkjumanna í þessum efnum. Þjóðkirkjan er einfaldlega slæmur sendiherra og glötuð auglýsing fyrir þann guð kristinna manna sem biskup segir vera fórnarlamb þöggunar á Íslandi,“ segir hann síðan.
„Biskup hélt ræðu sinni áfram og hjó í kunnuglegan knérunn sem sumir innan þjóðkirkjunnar leyfa sér því miður oft að beita. „Spurt var hvort samhengi væri á milli vanlíðunar ungs fólks og þess að ekki mætti lengur fræða börnin um kristna trú í skólum landsins,“ vitnaði biskup til umræðu á fundi einum. Þannig reynir biskup að varpa ábyrgðinni á því sem hún virðist telja sambandsleysi æsku landsins við guð kristinna manna á hið veraldlega skólakerfi – þar sem reyndar er í boði fræðsla um ýmis trúarbrögð eins og vera ber. „Við sem treystum þeim guði sem Jesús birti og boðaði vitum að í öllum aðstæðum lífsins er svar að finna í orði guðs,“ sagði Agnes í sjónvarpinu. Mikil er ábyrgð skóla landsins sem neita börnum um náð guðs,“ segir Garðar og bætir við að ekki sé að sjá nema litlu af öllum þeim milljörðum króna, sem þjóðkirkjan hefur í tekjur, sé varið til að efla andlegt líf þeirra barna sem biskup virðist láta sér annt um.
„Er hugsanlegt að það sé ekki raunveruleg sálarheill barnanna sem áhyggjurnar beinast að? Þær snúast kannski fremur um milljarða á milljarða ofan sem kirkjunnar þjónar reikna með í sinn vasa frá sóknarbörnum og skattgreiðendum framtíðarinnar?“ segir hann síðan að lokum.
