Úkraínumenn segjast reiðubúnir til friðarviðræðna í byrjun næsta árs og leggja til að Sameinuðu þjóðirnar stýri þeim.
En er þetta rétt? Eru Rússar og Úkraínumenn reiðubúnir til að setjast að samningaborðinu?
Jótlandspósturinn spurði Flemming Splidsboel, sérfræðing í rússneskum málefnum hjá hugveitunni Dansk Institut for Internationale Studier, og Claus Mathiesen, hernaðarsérfræðing hjá danska varnarmálaskólanum, um hvort stríðsaðilarnir séu virkilega reiðubúnir til að setjast að samningaborðinu.
Þeir voru sammála um að yfirlýstur vilji Úkraínumanna til að setjast að samningaborðinu sé brella af þeirra hálfu sem geti pirrað Pútín, sem eigi í vök að verjast, og muni varla færa þjóðirnar nær því að binda endi á stríðið.
Þeir sögðu að hin nýja yfirlýsing Úkraínumanna um vilja þeirra til friðarviðræðna sé mjög taktísk og sé ætlað að „afvopna“ sterk rök sem Rússar hafa sett fram fyrir alþjóðasamfélagið um viljaleysi Úkraínumanna til að setjast að samningaborðinu. Endurtekin höfnun þeirra á að setjast að samningaborðinu hefur sett þá í neikvæða stöðu á alþjóðavettvangi að þeirra sögn. Nú séu Úkraínumenn að reyna að bæta úr því.
Splidsboel sagði að með þessu séu Úkraínumenn að endurheimta frumkvæðið hvað varðar umræðuna um friðarviðræður. Mathiesen tók undir þetta og sagði að Úkraínumenn vilji ekki vera sá aðili sem hafni því blákalt að setjast að samningaborðinu. Með yfirlýsingu sinni núna gefi þeir til kynna að þeir séu reiðubúnir til að finna lausn.
Þeir sögðu báðir að hér væri um yfirborðskennd skilaboð að ræða því bæði Rússar og Úkraínumenn hafi fram að þessu sett ströng skilyrði fyrir að hægt sé að byrja að ræða um diplómatíska lausn á stríðinu.
