Rahinha og ólétt unnusta hans, Natalia Belloli, lentu í því að vera föst í kyrrsettri flugvél í þrjár klukkustundir. Knattspyrnumaðurinn lýsir yfir ósætti á samfélagsmiðlum.

Raphinha og Belloli voru á leið heim frá Brasilíu til Barcelona, þar sem leikmaðurinn spilar. Höfðu þau verið í fríi í heimalandinu eftir að Brasilía datt úr leik á Heimsmeistaramótinu í Katar.

Flugfélagið sem um ræðir er Tap Air Portugal og ástæða seinkunnar var að tvær töskur týndust.

„Mig langar að þakka TAP fyrir að skilja okkur eftir í flugvélinni í meira en klukkustund,“ segir kaldhæðinn Raphinha en svo bættist alltaf við tímann.

„Margir hér voru að millilenda og gátu ekki fengið sér hádegismat. Þeirra á meðal er ég en þau gefa okkur ekki mat eða neitt.

Þvílík vanvirðing á TAP.“

Raphinha hélt áfram og var allt annað en sáttur.

„Takk fyrir TAP enn og aftur. Það var ekki nóg með að fresta fluginu um þrjá tíma, þar sem við sátum inni í vélinni, þau náðu einnig að týna tveimur töskum.“