Kona var í dag sýknuð í Héraðsdómi Vesturlands af ákæru Lögreglustjórans á Vesturlandi um heimilisofbeldi og ólögmæta nauðung gagnvart dóttur eiginmanns síns.
Ákæran er til komin vegna átaka sem brutust út á milli kvennanna seint í desember árið 2019. Dóttirin kom þá á heimilið en hún hafði tímabundinn svefnstað í stofunni. Konan var að fara að halda upp á afmælið sitt og átti von á gestum.
Dóttirin varð mjög reið er hún sá að konan hafði flutt allt dótið upp á háaloft. Konan sagðist hafa gert það til að hafa fínt fyrir afmælið. Sem fyrr segir brutust út átök á milli kvennanna sem leiddu til ákæru með eftirfarandi verknaðarlýsingu:
„Fyrir ólögmæta nauðung, með því að hafa sunnudaginn 22. desember 2019 að … í …, veist að A…, kt. …, tekið í ökkla hennar, dregið hana niður stiga og haldið henni niðri, í framhaldinu ýtt henni út úr húsinu og komið þannig í veg fyrir að A… næði í föt í sinni eigu, allt með þeim afleiðingum að A… hlaut mar á bakhlið hægri framhandleggs fyrir miðju, mar innanvert á vinstri olnboga og skrapsár á hægra hné og ökkla.“
Konan lýsti atvikum með allt öðrum hætti, m.a. því að dóttir mannsins hennar hefði gripið í hana í stiganum og reynt að toga hana niður. Hún hafi orðið hrædd og gripið fast á móti í stúlkuna og komið henni út fyrir dyrnar. „Brotaþoli hefði þá gripið kúst sem stóð við hurðina og byrjað að slá í glugga á húsinu. Ákærða hefði þá opnað dyrnar og reynt að ná af henni kústinum. Þær hefðu lent í átökum um kústinn og þá hefði faðir brotaþola komið að þeim,“ segir í texta dómsins.
Sem fyrr segir átti atvikið sér stað skömmu fyrir árslok 2019 en stúlkan kærði ekki til lögreglu fyrr en 14 mánuðum seinna. Hún gaf þær skýringar á seinkuninni að hún hefði dottið í það í janúar árið 2020 og ekkert pælt í þessu fyrr en hún kærði.
Það var mat dómara að ekki væri hægt að færa sönnur á sekt konunnar enda engin vitni að átökunum fyrr en faðirinn/eiginmaðurinn kom á vettvang undir lok þeirra. Þá kemur fram í dómsorði að svo virðist sem atvikið hafi ekki sótt mikið á ungu konuna. Hin ákærða var því sýknuð. Þá var miskabótakröfu upp á 1,5 milljónir króna hafnað.
