Þeir telja að Rússar séu að undirbúa stórsókn í byrjun næsta árs. Hugsanlega endurtekningu á fyrstu vikum innrásarinnar þegar Rússar reyndu að ná höfuðborginni Kyiv á sitt vald.
Eftir að Pútín tilkynnti um hina „sérstöku hernaðaraðgerð“ sendi hann um 150.000 hermenn inn í Úkraínu. Hann reiknaði með að hersveitir hans myndu ná Kyiv og stærstum hluta landsins á sitt vald á um 10 dögum. Eins og kunnugt er tókst það ekki og eftir nokkrar vikur neyddust Rússar til að hörfa frá Kyiv.
Í samtali við The Economist sagði Valerii Zaluzhnyi, æðsti yfirmaður úkraínska hersins, að að Rússar séu að gera um 200.000 óþreytta hermenn reiðubúna til átaka. „Ég er ekki í vafa um að þeir reyna aftur að ná Kyiv,“ sagði hann og bætti við að stórsóknin gæti komið frá Donbas í austri, úr suðri eða frá Hvíta-Rússlandi.
Oleksii Reznikov, varnarmálaráðherra Úkraínu, sagði fyrir helgi, að sögn The Guardian, að sífellt fleiri sannanir komi fram um að Rússar séu að undirbúa stórsókn. Hann sagðist telja hugsanlegt að hún hefjist í febrúar. Þá muni helmingur þeirra 300.000 manna, sem voru kvaddir í herinn í haust, hafa lokið þjálfun. „Hinn helmingur þeirra herkvöddu, um 150.000 menn, þurfa um þrjá mánuði til að undirbúa sig“ sagði hann og bætti við að þetta þýði að næsta sókn Rússa geti byrjað í febrúar.
Rússar hafa að vonum ekki sagt neitt um yfirvofandi stórsókn því eitt af lykilatriðunum í hernaði er að halda slíkum áætlunum vandlega leyndum. Á því fengu Rússar að kenna í sumar þegar Úkraínumenn gerðu óvænta skyndisókn í Kharkiv og hröktu Rússa frá stórum landsvæðum.
Úkraínumenn vilja hins vegar láta heimsbyggðina vita að Rússar séu að undirbúa stórsókn því þeir eru háðir stuðningi og vopnasendingum frá Vesturlöndum og vilja því minna umheiminn á að mikil ógn stafar enn af Rússum þrátt fyrir marga ósigra þeirra að undanförnu.
