Hildur Sverrisdóttir, þingmaður Sjálfstæðisflokksins, vill að velferðarnefnd hafni frumvarpi heilbrigðisráðherra sem muni fela í sér bann við mentol sígarettum, enda séu engin rök fyrir slíku banni. Hún ritar um þetta grein sem birtist hjá Vísi í dag.

„Heilbrigðisráðherra hefur mælt fyrir innleiðingarfrumvarpi frá ESB sem mun banna Salem og Capri bláan ásamt öðrum mentol sígarettum. Tilgangurinn er að hlífa börnum, sem væri gott og blessað og sjálfsagt ef hægt væri að færa rök fyrir að mentol sígarettur hefðu einhvern tímann gert börnum eitthvað umfram aðrar sígarettutegundir. En svo er einfaldlega ekki.“

Hildur segir að rökstuðningurinn í frumvarpinu sé „vægast sagt rýr“ og þar sé aðeins vísað til þess að líkur séu á að tóbaksneysla hefjist ef tóbaksvara hefur einkennandi bragð. Hvergi komi fram að mentol bragð sé meiri hvati til reykinga.

Hildur segir að upplýst umræða og forvarnir virki betur en boð og bönn.

„Þá skiptir máli að hafa í huga að með frumvarpinu er ekki verið að stoppa af jarðarberja- eða súkkulaðisígarettur í stórum stíl. Það er verið að banna mentol sígarettur sem tæplega fjórðungur reykingafólks á Íslandi kýs að reykja umfram aðrar tegundir. Tegund sem enginn hefur sýnt fram á að hugnist ungmennum meir eða sé óumdeilt bragðbetra. Hins vegar er það fjórðungur fullorðins reykingafólks, djammreykingafólk og þær sem fara út á svalir í saumaklúbbnum sem kunna vel við sínar mentol sígó. Nú á að taka það frá þeim.“ 

Hildur segir þetta freklegt ójafnræði. Líkja megi þessu við að banna Pepsi max lime frekar en að banna alla sykurlausa drykki.

Þó að þetta sé innleiðingarfrumvarp frá ESB og EES-samningurinn vissulega mikilvægt viðskiptasamband þá sé það stundum svo að þær innleiðingar sem Íslendingum sé boðið upp á séu „helber vitleysa“ og dæmi um það sé þetta frumvarp.

„Það er því miður að því er virðist einhvers konar misskilningur eða sýndar lýðheilsuaðgerð sem er algerlega órökstudd. Það er einfaldlega engin rökrétt né lögfræðileg stoð fyrir því banni sem frumvarpið felur í sér.“