Zack Steffen, markmaður Middlesbrough, var miður sín er hann fékk fréttir af því að hann væri ekki á leið á HM í Katar.

Steffen greinir frá þessu í samtali við the Athletic en hann var óvænt ekki hluti af landsliðinu á HM.

Steffen er í láni hjá Boro frá Manchester City og á að baki 29 landsleiki en Gregg Berhalter taldi sig ekki hafa not fyrir hann að þessu sinni.

Bandaríkin komust í 16-liða úrslit mótsins en Matt Turner hjá Arsenal stóð á milli stanganna.

,,Augljóslega þá var þetta stórt högg. Ég var miður mín og það tekur tíma að komast yfir þetta,“ sagði Steffen.

,,Nú hefur ákveðinn tími liðið og ég hef náð að skoða stöðuna, þetta tilheyrir fortíðinni og ég þarf að halda áfram.“

,,Ég reyni að nota það sem hvatningu. Eins og ég segi þá heldur lífið áfram, svona getur fótboltinn verið.“