Þetta átti að vera mótleikur Trump og stuðningsfólks hans við því umfangsmikla kosningasvindli sem Trump hefur haldið fram að hafi átt sér stað í forsetakosningunum. Rétt er að hafa í huga að engar sannanir hafa verið færðar fyrir þessum staðhæfingum Trump og dómstólar hafa vísað málum af þessu tagi frá. Engu að síður hefur Trump haldið áfram að halda þessum lygum fram og það sama á við um margt stuðningsfólk hans.
Eftir því sem Talking Points Memo (TPM) segir þá varpa SMS, sem Mark Meadows starfsmannastjóri Trump, sendi og fékk ljósi á málið. Skilaboðin voru send eftir forsetakosningarnar í nóvember 2020 og fram að valdatöku Biden þann 20. janúar 2021.
Meðal skilaboðanna voru ein frá Ralph Norman, þingmanni Suður-Karólínu, sem sendi skilaboð til Meadows þann 17. janúar. Í þeim sagði hann að í ljósi þess sem hefði gerst væri enginn annar kostur í stöðunni en að lýsa yfir herlögum. „VILTU VINSAMLEGA HVETJA FORSETANN TIL AÐ GERA ÞAÐ!!“ skrifaði hann.
Norman vildi ekki tjá sig um málið við TPM.
Skilaboðin frá honum eru meðal 2.219 smáskilaboða sem Meadows varð að afhenda rannsóknarnefnd fulltrúadeildarinnar en hún rannsakar árás stuðningsfólks Trump á þinghúsið í Washington D.C. í janúar á síðasta ári.
TPM segir að meðal skilaboðanna séu að minnsta kosti 364 frá 34 þingmönnum Repúblikana sem kvarta undan kosningasvindli, sem þeir telja að hafi átt sér stað, og tillögur um hvernig sé hægt að ógilda niðurstöðurnar.
Marjorie Taylor Greene, þingkona frá Georgíu, sendi Meadows skilaboð þann 17. janúar þar sem hún benti á möguleikann á að lýsa yfir herlögum en lagði hugmyndina í munn ónafngreindra þingmanna Repúblikana. Hún sagði að þeir hefðu nefnt þennan möguleika í einkaspjallhópi þingmanna Repúblikana. „Ég veit ekkert um svona lagað. Ég vil bara að þú segir þetta við hann (Trump). Þeir stálu kosningunum. Allir vita það,“ skrifaði hún.
