Banaslys varð á Höfðabakka í Reykjavík í nótt en þar var ekið á gangandi vegfaranda. Þetta kemur fram í tilkynningu frá lögreglunni.

Tilkynning um slysið barst um hálfeittleytið í nótt, en bíll á leið norður Höfðabakka, nálægt Árbæjarsafni, lenti á vegfarandanum, sem var karlmaður á fimmtugsaldri. Hann var fluttur á Landspítalann, en lést þar síðar um nóttina.

Lokað var fyrir umferð um Höfðabakka, á milli Bæjarháls og Stekkjarbakka, á meðan unnið var á vettvangi.

Í tilkynningunni segir ennfremur: „Ekki er hægt að veita frekari upplýsingar að svo stöddu, en Lögreglan á höfuðborgarsvæðinu og rannsóknarnefnd samgönguslysa rannsaka tildrög slyssins.“