Tveir þingmenn Pírata, þau Arndís Anna Kristínardóttir Gunnarsdóttir og Björn Leví Gunnarsson, hafa lagt fram frumvarp á Alþingi sem felur í sér að bann gegn klámi verði afnumið úr íslenskum lögum. RÚV greinir frá þessu.

Meðal þeirra sem rita umsögn um frumvarpið í samráðsgátt er Femínistafélag Háskóla Íslands og er félagið mjög jákvætt gagnvart frumvarpinu.

„Nauðsynlegt er að vernda börn og raunveruleg fórnarlömb en ekki gera fólk innan klámiðnaðarins að glæpafólki eða annars flokks borgurum. Því erum við ánægð með að tillagan taki fram að haldið sé í þau lög sem eru nú þegar til staðar um börn. Ekki ætti að vera refsivert að sjálfráða einstaklingar taki ákvörðun sjálfir um dreifingu á efni af sjálfu sér,“ segir í umsögninni og telur félagið að fáránlegt sé að glæpavæða efni á Onlyfans enda sé það gert með fullu samþykki þátttakenda.

Femínistafélagið bendir á að íslensk lög um klám séu barn síns tíma enda hafi þau staðið að mestu leyti óbreytt í meira en 150 ár. Ennfremur segir:

„Þessi hegningarlög ættu að snúast um að vernda samfélagið í heild en ekki að lítillækka fólk sem starfar innan kynlífsiðnaðarins. Breytingar eins og þetta frumvarp vinnur að er nauðsynlegt til að senda skýr skilaboð um að uppfæra þurfi reglurnar til að aðlagast nútímasamfélagi.

Það sem þessi gömlu lög og þeirra orðalag gera er að brengla viðhorf almennings til kynlífs, kynfrelsis og kynverundar.“

Helga Gunnlaugsson, prófessor í félagsfræði við Háskóla Íslands, ritar einnig umsögn við frumvarpið. Helgi telur blátt bann við klámi lýsa óskhyggju þeirra sem telji að hægt sé að útrýma öllu óæskilegu og óþægilegu í heiminum með einföldum lagasetningum. Fullorðið fólk eigi að hafa rétt til að njóta þess efnis sem þau kjósa í krafti tjáningarfelsis. Samfélagið geti síðan útfært þann rétt nánar.

Helgi bendir á að rannsóknir hans sýni að margir Íslendingar heimsæki klámsíður á netinu. Bann við klámi á Íslandi komi engan veginn í veg fyrir að fólk skoði klám. Helgi skrifar ennfremur:

„Löggjöf af þessu tagi opnar óhjákvæmilega fyrir geðþótta einstakra dómstóla og dómara og það sem kallast í afbrotafræðinni „brotamaðurinn valinn“ (e. selective enforcement). Hópar eða einstaklingar sem samfélaginu eða hópum innan þess er í nöp við einhverra hluta vegna eru teknir fyrir og dæmdir fyrir refsiverða háttsemi meðan aðrir eru látnir í friði. Ákvæði um bann við jafn óljósri háttsemi og klámi er sérstök hætta búin til að vera beitt með þessum hætti.“

Helgi segir að rannsóknir hafi ekki sýnt fram á tengsl kláms og kynferðisglæpa. Hins vegar geti kynferðisbrotamenn notað klámfengið efni til að réttlæta brot sín.

Umsögn Femínistafélags Íslands um frumvarpið

Umsögn Helga Gunnlaugssonar um frumvarpið