Kristinn Freyr Sigurðsson er genginn aftur í raðir Vals og verður kynntur sem leikmaður félagsins á allra næstu dögum.

Þetta herma öruggar heimildir 433.is en Kristinn lék með FH síðasta árið en snýr nú aftur í Val.

Heimir Guðjónsson sem tók við FH á dögunum tók þá ákvörðun fyrir ári síðan að losa sig við Kristin Frey frá Val.

Strax og Heimir tók við FH á dögunum fóru af stað kjaftasögur um að Kristinn færi frá félaginu og nú er það raunin.

Kristinn sem verður 32 ára á næsta ári lék 29 leiki með FH í deild og bikar í sumar og skoraði í þeim leikjum fjögur mörk.

Arnar Grétarsson tók við þjálfun Vals á dögunum og er Kristinn annar leikmaðurinn sem Arnar fær til félagsins, áður hafði félagið fengið Elfar Frey Helgason.

Þetta er í þriðja sinn sem Kristinn gengur í raðir Vals en fyrst kom hann til félagsins árið 2012 en hélt í atvinnumennsku eftir tímabilið 2016 en kom aftur fyrir tímabilið 2018.

Hann gekk svo í raðir FH fyrir ári síðan en er nú mættur á Hlíðarenda í þriðja sinn.