Efling hefur vísað kjaradeilu sinni við Samtök atvinnulífsins til ríkissáttasemjara. Í erindi sínu til embættisins segir að viðræður milli aðila samkvæmt viðræðuáætlun þeirra hafi reynst árangurslausar.
„Við erum eina félagið sem hefur sett fram kröfugerð með tölusettum launakröfum. Við höfum verið opinská og heiðarleg við okkar viðsemjendur. Áhuga- og virðingarleysi Samtaka atvinnulífsins gagnvart félagsfólki Eflingar er hins vegar algjört. Okkur eru ekki veitt svör eða viðbrögð. Það er því rétt og óhjákvæmilegt að vísa deilunni til ríkissáttasemjara eins og heimilað er í lögunum um kjaraviðræður,“ sagði Sólveig Anna Jónsdóttir formaður Eflingar í tilkynningu.
Samningafundur hefur enn ekki verið boðaður en áður höfðu farið fram fjórir samningafundir milli Samtaka atvinnulífsins og samninganefndar Eflingar, allir fundirnir áttu sér stað í nóvember.
