Ákvörðun Seðlabankans um að hækka stýrivexti enn eina ferðina hefur reynst umdeild. Ásgeir Jónsson, seðlabankastjóri, freistaði þess að útskýra hagfræðina á bak við ákvörðunina með því að kenna einkaneyslunni um og þá sér í lagi tíðar tásumyndir frá Tenerife. Þessu tóku margir landsmenn óstinnt upp enda bróðurpartur þjóðarinnar heimsótt eyjuna fögru heim og margir kunnu því illa að fá samviskubit yfir því að gera vel við sig.

Í morgun greindi Vísir svo frá því að Ásgeir væri einn þeirra sem að aldrei hefði heimsótt Tenerife. Flugfélagið Play sá sér leik á borði og henti fram tilboði sem Seðlabankastjóri mun eiga erfitt með að hafna.

„Þetta gengur náttúrlega alls ekki. Við viljum endilega bjóða þér Ásgeir Jónsson til Tenerife í skiptum fyrir eina glæsilega tásumynd. Þú verður þó að svara boðinu frekar fljótt þar sem ferðirnar eru geisivinsælar, enda vorum við með um 90% sætanýtingu á Tenerife í síðasta mánuði,“ sagði í færslu flugfélagsins.

Ásgeir er sennilega að pakka Speedo-skýlunni niður í tösku í þessum skrifuðu.