Eftir því sem bandaríska varnarmálaráðuneytið Pentagon segir þá nota Rússar 20.000 fallbyssuskot á dag fyrir stórskotalið sitt í Úkraínu. Þetta er svo mikil notkun að þeir hafa ekki undan að framleiða fallbyssuskot og þvi ganga þeir á birgðir sínar.

Avril Haines, forstjóri bandarísku leyniþjónustunnar, ræddi um þetta á laugardaginn að sögn NBC News. Hún sagðist ekki geta sagt nákvæmlega til um hversu hratt þeir ganga á birgðir sínar en það gerist hratt og að bandarísk yfirvöld telji að Rússar geti ekki framleitt jafn mikið og þeir nota núna. Þetta sé því áskorun sem þeir standa frammi fyrir.

Í nóvember sagði Pentagon að Rússar noti 20.000 fallbyssuskot á dag þrátt fyrir að þeir hafi verið hraktir frá stórum landsvæðum í Úkraínu.

Jeremy Fleming, yfirmaður bresku leyniþjónustunnar GCHQ, sagði nýlega að rússneska herinn vanti bardagafæra hermenn, hergögn og skotfæri. „Við vitum, og rússneskir herforingjar á vígvellinum vita, að þeir eru að verða uppiskroppa með birgðir og skotfæri,“ sagði hann að sögn BBC.

Fleming sagði að Rússar líði mikið tap á vígvellinum, bæði hvað varðar fallna hermenn en einnig á hergögnum. Ástæðan sé að stórum hluta vegna ákvörðunar rússnesku ríkisstjórnarinnar að láta fanga og óreynda menn berjast í Úkraínu.