Litlu mátti muna að barn hefði orðið fyrir bíl í Kópavogi í morgun. Eins og sjá má á meðfylgjandi myndbandi úr myndavél á mælaborði, sem tekið var á Vatnsendavegi skammt frá Kórnum, þá kemur bíll aðvífandi að hringtorgi þegar að barnið þýtur yfir gangbraut á rafhlaupahjóli án þess að gæta að sér eða stoppa og líta til beggja hliða. Atvikið átti sér stað um kl. 08.20 í morgun og því var mjög dimmt úti og skyggni lélegt.
Þökk sé árvekni bílstjórans slapp barnið með skrekkinn en hljóðin í lok myndbandsins, sem í fyrstu hljóma eins og árekstur hafi átt sér stað, eru blessunarlega hlutir í bílnum sem hentust til þegar bílstjórinn nauðhemlaði.
Bílstjóranum, sem vill ekki láta nafn síns getið, var eðli málsins samkvæmt verulega brugðið við atvikið og upplifaði allskonar tilfinningar.
„Ég var mjög feginn að hafa sloppið við að keyra á hann/hana en upplifði svo reiði yfir því að krakkar séu ekki að gefa okkur í umferðinni tækifæri á því að stoppa fyrir þeim. Það vill enginn keyra á einhvern,“ segir bílstjórinn.
Fleiri sögur af hættulegri hegðun barna á slíkum hjólum hafa borist ritstjórn og því er ljóst að skynsamlegt væri ef foreldrar ræða við börn sín sem nota slík hjól til að ferðast í og úr skóla, sérstaklega um hvernig eigi að fara yfir umferðagötur.
