Það kom upp skondið atvik á RÚV í gær í HM kvöldi. Þá héldu þáttastjórnendur að Neymar hefði verið í stúkunni á leik Brasilíu og Sviss.
Neymar er meiddur og var því ekki með Brössum í 1-0 sigri í gær. Hann tók leikinn í sjónvarpinu en tvífari hans mætti hins vegar á völlinn. Margir héldu að þetta hafi verið hann og þar á meðal fólkið í setti á RÚV.
„Ég veit ekki hvað Neymar hélt að hann gæti gert í stúkunni,“ sagði Helga Margrét Höskuldsdóttir.
Bjarni Guðjónsson var í setti og lagði orð í belg. „Hann var með hatt og gleraugu. Hann hefur kannski haldið að hann væri í dulargervi.“
Sjá einnig:
Gabbaði alla í Katar dag og eina stærstu sjónvarpsstöð í heimi – Sjáðu hvernig hann fór að
Þetta var tekið fyrir í HM-hlaðvarpi íþróttadeildar Torgs (Fréttablaðsins og DV).
„Fox Sports féll meira að segja fyrir þessu líka,“ segir Hörður Snævar Jónsson í þættinum.
Helgi Fannar Sigurðsson tók til máls og skilur hann starfsfólk RÚV að vissu leyti.
„Hann er eiginlega alveg eins og Neymar. Ég held hann sé með sömu húðflúr og allt. Það er samt svolítið fyndið að enginn af þeim fjórum í settinu finndist athugavert að Neymar sé bara með almúganum í stúkunni.“
Hörður segir að menn hefðu átt að vera búnir að fatta þetta um kvöldið.
„Manni finnst ótrúlegt að þeir falli í þessa gryfju því klukkutíma áður en þetta birtist á RÚV var Fox nú búið að leiðrétta sig, við vorum búnir að skrifa frétt um þetta.
Ég veit að það einkarekna hafði gaman af því að sjá „the lamestream media“ falla í þessa gryfju en þetta var nú bara eðlilegt.“
„Maður skilur þetta kannski í beinni en í markaþættinum um kvöldið ætti að vera búið að lauma skilaboðunum á þau,“ segir Helgi að lokum.
