Fréttablaðið skýrir frá þessu í dag og hefur eftir Önnu Eyjólfsdóttur, formanni Sambands íslenskra myndlistarmanna, að félagsmenn undrist þessar tafir á ráðningu. „Mínir félagsmenn eiga ekki orð,“ sagði hún.
Gunnar B. Kvaran var metinn hæfastur af þeim fjórum sem voru metnir hæfir til að gegna stöðunni en alls sóttu sjö um stöðuna. Gunnar hefur verið forstöðumaður listasafna hérlendis og erlendis um áratugaskeið. Á síðustu árum hefur stýrt stærsta einkasafni heims með nútímamyndlist en það er í Osló. Hann hefur dregið umsókn sína til baka.
Telja margir það vera mikið hneyksli að stjórnsýslan hafi misst af svo hæfum manni. „Hann var maðurinn til að rífa upp safnið á nýjaleik (sic),“ hefur Fréttablaðið eftir heimildarmanni.
Aðspurður sagði Gunnar að þegar líða fór á hafi hann ekki langað nógu mikið til að flytja til Íslands.
Lilja Alfreðsdóttir, sem er ráðherra málaflokksins, segir að um vandaða stjórnsýslu sé að ræða og hafnar því að ráðningin hafi dregist úr hömlu. „Við ætlum að vanda okkur sérstaklega við ráðninguna,“ sagði hún en skemmst er að minnst harðrar gagnrýni sem hún fékk yfir sig eftir skipun þjóðminjavarðar nýlega.
