Landsréttur mildaði verulega fangelsisdóm yfir Dumitru Calin sem var dæmdur manndráp af gáleysi og fyrir að hafa látið farast fyrir að koma manni til bjargar er Daníel Eiríksson lét lífið á föstudaginn langa árið 2021. Héraðsdómur komst að þeirri niðurstöðu að Calin skyldi dæmdur í 42 mánaða fangelsi fyrir verknaðinn en Landsréttur ákvað að milda dóminn niður í tveggja ára fangelsi.
Þetta kemur fram í dómi sem birtur var á heimasíðu Landsréttar nú fyrir stundu. Ákæruvaldið fór fram á að dómurinn yrði staðfestur og refsing Dumitru yrði þyngd en Landsréttur komst að annarri niðurstöðu. Málsvörn Dumitru var sjálfsvörn og tók Landsréttur meðal annars undir það að miðað við samskipti þeirra hafi hann haft ástæðu til að óttast Daníel.
Í dómnum kemur fram að Dumitru hafi ekið bifreið á 15-20 kílómetra hraða á klukkustund út af bílaplani þrátt fyrir að Daníel hafi haldið báðum höndum um hliðarrúðu hans sem dregin var niður að hluta. Daníel dróst þannig eða hljóp með bifreiðinni að minnsta kosti 13,9 metra en þá féll hann í jörðina. Í kjölfarið ók Dumitru af vettvangi án þess að huga að Daníeli.
Kemur fram í dómi Landsréttar að framburður Dumitru hafi hvorki verið skýr né fullkomlega stöðugur. Þannig hafi hann bæði borið að Daníel hafi staðið upp og hlaupið á eftir bifreiðinni og að hann hafi einungis reyntað standa á fætur. Eitthvað sem að sérfræðingur taldi afar ólíklegt en Daníel lést af völdum alvarlegs höfuðáverka. Ástand hans hafi verið mjög alvarlegt eftir að hann hlaut höfuðhöggið og ólíklegt að læknar hefðu getað bjargað lífi hans.
Auk fangelsisvistarinnar var Dumitru greiða alls 12.110.235 krónur samanlagt í miskabætur, sakarkostnað og málsvarnarlaun. Í dómi Landsréttar var hann að auki látinn greiða helminginn af rúmlega 1,5 milljón króna áfrýjunarkostnaði.
Sjá einnig: Harmleikurinn í Vindakór:Dumitru ræddi við DV – „Ég er mjög sorgmæddur yfir þessu“
