Það var umdeilt þegar Bergsveinn Ólafsson ákvað að leggja skóna á hilluna vorið 2020, skömmu fyrir Íslandsmót.

Bergsveinn var fyrirliði Fjölnis á þessum tíma og töldu margir þetta skref hans athugavert. Fjölnir var nýliði í efstu deild þetta ár.

Kristján Óli Sigurðsson var einn af þeim sem gagnrýndi Bergsvein harkalega.

„Honum var ekki haggað, þessum leiðtoga sem ég verð að setja í þykkustu gæsalappir sögunnar. Leiðtogar hoppa ekki frá borði fimm mínútum fyrir Íslandsmót. Einn launahæsti leikmaður liðsins, búinn að taka laun þarna frá því í október og fram í apríl. Þetta er diss á liðsfélaga, þjálfara og félagið í heild. Ef ég væri liðsfélagi hans þá væri ég búinn að eyða honum úr símaskránni,“ sagði hann í Dr. Football á sínum tíma.

„Þetta er lélegt og aumingjaskapur,“ bætti hann við.

Bergsveinn er gestur í nýjasta þætti Chess After Dark, þar sem þetta var rætt.

„Hann (Kristján) hefur eitthvað blæti fyrir mér. Hann hefur verið á bakinu á mér frá því ég var með snúð hjá FH að taka sætið af Guðmanni Þórissyni, sem er bara flott,“ segir Bergsveinn léttur.

Hann viðurkennir að ákvörðunin hafi komið illa við Fjölni.

„Út frá hlið Fjölnis var þetta auðvitað ekki góð ákvörðun. En ég var þarna búinn að lofa sjálfum mér það að ef ég myndi fá leið á fótbolta myndi ég hætta.

Ég er þannig að ég vil gera hluti 100 prósent eða sleppa þeim. Mér fannst ég ekki getað helgað mér 100 prósent að verkefninu hjá Fjölni. Ég var að fá góð laun og hugsaði að Fjölnir gæti nýtt þann pening í að fá einhvern sem getur hjálpað þeim enn betur.“

Bergsveinn skilur gagnrýnina.

„Ég hugsa oft hvort ég hefði bara átt að klára tímabilið og láta mig hafa það. Ég skil vel þá gagnrýni sem ég fékk.“