Ragnar Sigurðsson, fyrrum landsliðskempa og núverandi umboðsmaður fékk sér sæti í Íþróttavikunni með Benna Bó, sem sýnd er á Hringbraut alla föstudaga. Hörður Snævar Jónsson, íþróttastjóri Torgs, sat með Ragnari í settinu en þeir félagar fóru meðal annars yfir íslenskt hugarfar sem hafi verið svo þekkt. Þeim fannst eins og það væri á undanhaldi.

Hörður benti á að íslendingar séu að verða tæknilega betri í öllum íþróttum. Ekki aðeins í fótbolta heldur líka í handbolta og körfubolta. En hann hefur áhygggjur af hugarfarinu hjá krökkum í dag sem Ragnar tók undir.

„Handboltinn, körfuboltinn og fótboltinn bæði karla og kvenna hafa farið á stórmót með ótrúlegu hugarfari. Ég hef smá áhyggjur því við, sem þjóð, við höfum alltaf verið góð í kollinum. Manni finnnst eins og maður sjái smá breytingu. Að við séum að vera betri tæknilega en þetta andlega sé ekki jafn gott og áður,“ sagði Hörður.

Ragnar tók undir þetta.

„Ég er 100 prósent sammála. Þegar maður var að tala við þessa kynslóð mína í landsliðinu, sem eru reyndar flest allir hættir, við vorum svolítið að fara þetta á hörkunni og samvinnunni. Þegar yngri strákar voru að koma upp þá ætluðu þeir að taka skærin og líta vel út. Það er klárlega þannig að hugarfarið er búið að breytast,“ benti hann á.

Benedikt Bóas, umsjónarmaður þáttarins sagði þá á að ungt fólk í dag vill frekar líta vel út og tapa en að hafa grasgrænku í stuttbuxunum og blóð á hnjánum og líta illa út á myndum en vinna leiki. „Það er orðið svolítið svoleiðis,“ sagði Ragnar.