Lögmaðurinn, Sigurður G Guðjónsson hefur sterka skoðun á því sem RÚV gerir og hvaða skildum ríkismiðilinn hefur.
Hann skrifar pistil í dag þar sem hann gagnrýnir forgangsröðun RÚV. Bendir hann á það að RÚV hafi ekki sent neinn fréttamann á loftslagsráðstefnu Sameinuðuþjóðanna sem var að ljúka í Egyptalandi.
Sigurður telur að það skjóti skökku við en á sama tíma er RÚV með þriggja manna teymi á Heimsmeistaramótinu í Katar.
„Fjölmiðill í almannaþágu. RÚV er skilgreint sem fjölmiðill í almannaþágu,“ skrifar Sigurður í pistli á Facebook í dag.
Hann ritar svo um loftslagsráðstefnu Sameinuðu þjóðanna sem var að ljúka í Egyptalandi og furðar sig á fjarveru RÚV þar. „Í samræmi við þetta hlutverk segir RÚV mikið frá loftslagsvá og hamfarahlýnun í fréttum. Stjórnendur og starfsmenn RÚV eru mjög meðvitaðir um að allir þurfi að leggjast á árarnar, ef takast á að bjarga heiminum frá glötun, sem mun vera á næsta leyti samkvæmt yfirlýsingum aðalritari Sameinuðuþjóðanna. Athygli vakti því að RÚV virtist ekki hafa átt neitt erindi á loftslagsráðstefnu Sameinuðuþjóðanna sem var að ljúka í Egyptalandi.“
„Kannski hafa stjórnendur RÚV litið svo á að þeirra væri ekki þörf í eyðimerkur sólinni í Egyptalandi sem handhafa fjórðavaldsins á Íslandi; treysta mætti öðrum handhöfum valds frá Íslandi til að gæta hagsmuna Íslands og heimsins alls, enda Ísland fremst þjóða í orkuskiptum og getur jafnvel selt orkuskipti úr landi án þess að flytja orku út. Það er ákveðin list og sannar að máttur peninga er mikill.“
Sigurður segir að það sé furðulegt að RÚV telji sig þurfa að fara til Katar. „RÚV taldi hins vegar nauðsynlegt í nafni fjölmiðlunar í almannaþágu að senda flokk fólks til Katar; olíuríkis við Persaflóa, sem er þekkt fyrir þrælahald og hvers kyns mismunun kynjanna og mikla framleiðslu jarðefnaeldsneytis,“ segir Sigurður.
„Jarðefnaeldsneyti er eitur í beinum helstu áhrifavalda innan vébanda RÚV; þeirra ferðamáti er tveir jafnfljótir eða í bestafalli reiðhjól eða batterísbíll. Áhrifavaldarnir hafa þó ekki enn gengið yfir sjó og land til að geta sagt frá stórviðburðum eins og Eurovision, enda má brjóta öll prinsipp þegar mikið liggur við fyrir almenning.“
Heimir Hallgrímsson er sérfræðingur RÚV í Katar og þá tók miðilinn viðtal við Vöndu Sigurgeirsdóttur í Doha í gær.
„Af fréttum RÚV frá Katar að dæma virðist erindið fréttamanna stofnunarinnar til olíuríkisins hafa verið að ná annars vegar tali af tannlækni úr Vestmannaeyjum, sem þjálfar í hjáverkum landslið eyjaskeggja í Suðurhöfum, og hins vegar formanni KSÍ. Sennilega hefði mátt ná í tannlækninn á Íslandi áður en hann fór til Katar þar sem hann er öllum hnútum kunnur vegna fyrri þjálfarastarfi þar.“
„Öðru máli gegnir með formann KSÍ í hann hefur ekki náðst vegna anna við að bjarga heimsknattspyrnunni úr klóm feðraveldisins. Formaðurinn hefur því ekki getað svarað fyrir ýmis smámál sem komið hafa upp innan KSÍ, eins og mismunun kynja og skort á almennri kurteisi. Þessi innanbúðarmál hjá KSÍ hafa að því er virðist tekið svo á formanninn að hann vatnaði músum í viðtalinu við RÚV. Ljóst er hins vegar af viðtalinu mannréttindabrot í Katar leggjast ekki þungt á herðar formanns KSÍ frekar en félaga hans innan FIFA sem gerir alltaf vel við sitt fólk. Svona er RÚV Okkar Allra alltaf með puttann á púlsi stórmálanna,“ segir Sigurður í pistli sínum.
