Eins og flestir hafa orðið varir við hefur margt vafasamt farið fram utan vallar á Heimsmeistaramótinu í Katar sem hófst í gær.

Fyrr í dag bárust fréttir af því að fyrirliðabönd í regnbogalitum yrðu ekki notuð í leikjunum. Þetta var ákveðið eftir að FIFA hótaði að spjalda fyrirliða sem myndu bera böndin.

Harry Kane í enska landsliðinu og fleiri fyrirliðar ætluðu að bera böndin til að sýna hinsegin fólki stuðning en allt kom fyrir ekki.

„Þetta er mjög vandræðalegt. England er búið að halda því fram að þeir ætluðu að gera þetta og Kane langaði að vera með þetta band,“ segir Helgi Fannar Sigurðsson í HM-hlaðvarpi íþróttadeildar Fréttablaðsins og DV.

Hörður Snævar Jónsson tók í svipaðan streng.

„Það er eiginlega ótrúlegt að FIFA taki svona hart á þessu. Það verður að segjast eins og er að þó að fyrirliðabandið sendi sterk skilaboð þá eru þetta engin hörð mótmæli yfir því sem er í gangi í Katar.“

Það er einnig búið að banna bjórinn á völlum í Katar.

„Það virðist vera rosaleg meðvirkni með yfirvöldum í Katar á þessu móti,“ segir Helgi.

„Ég sá fyrir mér að Katar myndi gera eins og Rússland og setja upp góðan leikþátt í mánuð, vera góð auglýsing fyrir heimsbyggðina. Svo eru þeir svo harðir á sínum reglum að það er ekkert í boði.“

RÚV sinnir mótinu vel og er með fólk á sínum snærum úti í Katar.

„Það er nóg til á ríkissjónvarpinu, senda út fólk til Katar þó það bæti reyndar engu við umfjöllunina. Það er fínt að vera á ríkissjónvarpinu, frussar út peningunum okkar,“ segir Hörður.

„Það er kósý að vera á RÚV,“ bætir Helgi við að lokum.

HM-hlaðvarp íþróttadeildar Fréttablaðsins og DV kemur út alla morgna á meðan mótinu stendur