Áhrifavaldurinn og hlaðvarpsstjórnandinn Vigdís Howser Harðardóttir og vinkona hennar Sara Rut voru að birta myndband frá ferðalagi þeirra til New York.

Í samtali við DV segir Vigdís að þetta sé rétt svo bara byrjunin og þetta sé fyrsti þátturinn í seríu sem er lauslega byggð á vinsæla raunveruleikaþættinum Ameríski draumurinn.

Í fyrsta þætti fáum við að fylgjast með ævintýrum þeirra í New York. Eins og þegar þær fengu sér kannabis gúmmíbangsa áður en þær fóru að skoða Empire State bygginguna eða þegar Sara fékk matareitrun og ældi í glas á tónleikastaðnum þar sem Sigur Rós var að spila. Það er líka nóg um partí og alls konar skemmtilegheit.

Spenntar að gefa út meira efni

„Þetta er þáttur sem ég og Sara framleiddum og tókum upp og hún klippti. Við erum mjög spenntar fyrir því að gera eitthvað svona áfram. Þetta er svolítið svona í líkingu við Ameríska drauminn og Asíska drauminn sem Auddi og þeir gerðu. Það var svona upprunalega hugmyndin hjá okkur, að gera eitthvað svipað en bara; við stelpurnar að gera það,“ segir Vigdís í samtali við DV.

Hún segir að það væri draumur ef einhver myndi vilja gefa þættina út. „Vonandi finnst fólki þetta skemmtilegt. Þetta eru bara við að bulla í New York,“ segir hún og hlær.

„Við vorum í tvær vikur og tókum upp mjög mikið af efni, þetta er svona brot af því besta.“

Horfðu á þáttinn hér að neðan.