Gary Neville, sparkspekingur og fyrrum leikmaður Manchester United, telur að Cristiano Ronaldo hefði átt að bíða í einn dag með að tilkynna að umdeilt viðtal hans og Piers Morgan væri að koma upp.

Klippur úr viðtalinu hafa verið að birtast síðan á sunnudagskvöldið. Fyrri hluti þess birtist svo í heild í gærkvöldi. Ronaldo fer mikinn í viðtalinu og gagnrýnir United, leikmenn og þjálfara, harðlega.

Sama kvöld og tilkynningin um viðtalið barst sigraði United Fulham á dramatískan hátt, 1-2, þar sem hinn 18 ára gamli Alejandro Garnacho skoraði sigurmarkið.

„Þetta var stór stund fyrir strákinn. Ef ég væri Cristiano Ronaldo hefði ég heyrt í Piers Morgan og beðið með að birta þetta þar til daginn eftir, leyft stráknum að eiga sitt kvöld og fyrirsagnirnar í fyrramálið,“ segir Neville.

Hann segist ekki hafa neitt á móti því að leikmenn fari í viðtöl eins og Ronaldo fór í. „Ég vona að hann hafi valið að fara í þetta viðtal sjálfur en ekki ráðlagt að gera það.

Mér finnst frábært að leikmenn geti svarað fyrir sig. Ef ég gagnrýni leikmann vil ég að hann geti sagt eitthvað til baka við mig. Ég ætla ekki að gagnrýna hann fyrir að fara í viðtalið því ég vil að leikmenn geri meira af þessu.“

„Þetta var samt mikilvægt stund fyrir strákinn og hann hefði átt að bíða með tilkynninguna,“ segir Gary Neville.