Bresku samtökin NSPCC, sem vinna gegn ofbeldi og illri meðferð á börnum, segja fulla ástæðu til að hafa áhyggjur af líðan margra barna á meðan á mótinu stendur. Segja samtökin að reikna megi með að heimilisofbeldi, sem beinst gegn börnum, muni færast í aukana á meðan mótið stendur yfir. Þau benda á að þegar HM fór fram 2018 hafi hringingum barna í hjálparlínu fjölgað um þriðjung miðað við það sem venjulegt er. Sky News skýrir frá þessu.
Samtökin segja að börnin séu í meiri hættu vegna aukins stress á heimilinu vegna mótsins, meiri áfengisneyslu og veðmála.
Samtökin nefna sem dæmi það sem 13 ára stúlka sagði þegar HM 2018 stóð yfir: „Bróðir minn verður mjög árásargjarn þegar hann drekkur. Hann öskrar á okkur að ástæðulausu og heimtar peninga frá mömmu. Eftir leik Englands í dag, kom hann drukkinn heim og sló mömmu í andlitið, ég varð að hringja í lögregluna. Hann hefur verið til vandræða árum saman og í hreinskilni sagt þá hef ég fengið nóg af honum. Ég vildi óska að hann myndi hverfa úr lífi okkar svo ég og mamma séum ekki alltaf svona hræddar.“
Móðir annars barns, sem hafði samband við NSPCC fyrir fjórum árum, sagði: „Besta vinkona dóttur minnar sagði mér að pabbi hennar lemji hana og móður hennar. Hann drekkur mikið á barnum og beitir ofbeldi þegar hann kemur heim.“
Rannsókn, sem var birt fyrr á árinu, sýndi að bein tengsl eru á milli stórra íþróttaviðburða og fjölda tilkynninga um heimilisofbeldi.
Fimmta hvert breskt barn hefur orðið fyrir illri meðferð, þar á meðal kynferðisofbeldi og heimilisofbeldi.
