Raphael Varane, leikmaður Manchester United, viðurkennir að viðtal Cristiano Ronaldo sem hefur verið á allra vörum hafi haft áhrif á leikmenn liðsins.
Ronaldo fór í viðtal við Piers Morgan. Þar lét hann mann og annan heyra það, þar á meðal stjórann Erik ten Hag. Þá sakaði Portúgalinn fólk innan United um að reyna að bola sér út.
„Þetta hefur augljóslega áhrif á okkur. Við fylgjumst með því sem er í gangi og því sem er sagt,“ segir Varane.
„Við reynum að vera rólegir og skipta okkur ekki af þessu.“
Það þykir líklegt að dagar Ronado hjá United séu senn taldir nú í kjölfar viðtalsins. Varane mun sætta sig við þá niðurstöðu sem stjórnin tekur varðandi liðsfélaga sinn.
„Ég vil bara það sem er best fyrir liðið mitt. Sama hver ákvörðunin verður munum við leikmenn samþykkja hana og gera okkar besta.“
