Athafnamaðurinn Sigmar Vilhjálmsson segir fótboltann á Íslandi kæfa aðrar íþróttir. Segir hann að börn reyni gjarnan ekki fyrir sér í öðrum íþróttum vegna þess pláss sem fótboltinn tekur.

Þessi umræða spratt upp í hlaðvarpsþættinum 70 Mínútur. Kom hún upp í kjölfar þess að Sigmar gagnrýndi Knattspyrnusamband Íslands fyrir það að veita leikmönnum kvennalandsliðsins ekki sömu verðlaun og leikmönnum karlalandsliðsins fyrir leikjafjölda fyrir þjóð sína.

„Það sem ég þoli ekki við KSÍ er yfirgangurinn, frekjan og tillitsleysið í fótboltanum á Íslandi. Þessi íþrótt er að drepa aðrar íþróttir á Íslandi,“ segir Sigmar.

„Veistu hvað eru mörg börn þarna úti sem væru kannski Íslandsmeistarar í baksundi en vita ekki af því af því þau verða að velja fótbolta? Fótboltinn er svo frekur og ógeðslega leiðinegur, setur tímatöflur alla daga, leiki allar helgar. Það er ekkert pláss fyrir krakka að stunda aðrar íþróttir.“

Sigmari finnst sorglegt að hæfileikar barna sem eiga erfitt uppdráttar í fótboltanum nýtist ekki annars staðar.

„Við erum að ala upp fullt af börnum sem eru kannski í C og D liði með brotna sjálfsmynd en eru kannski bara Íslandsmeistarar í þrístökki, baksundi, hástökki. Þau vita bara ekki af því.

Foreldrar eru dregnir eldsnemma í eitthvað ískalt yfirbyggt fótboltahús á Akranesi að spila eitthvað fótboltamót sem enginn hefur áhuga á, ekki einu sinni þeir sem eru að dæma eða þjálfa. Það er fullt af krökkum í A, B, C, D og E liði sem hafa ekkert erindi í fótbolta, kunna ekki fótbolta og eiga ekki að vera í fótbolta en gætu verið Íslandsmeistar í baksundi og verið ótrúlega flottir einstaklingar með gott sjálfstraust.“