James Garner hefur útskýrt það af hverju hann ákvað að yfirgefa lið Manchester United í sumar til að semja við Everton.

Garner kostaði Everton 15 milljónir punda en hann sá ekki fram á það að hann fengi tækifæri á Old Trafford í vetur.

Garner er fæddur og uppalinn í Manchester og viðurkennir að það hafi verið erfitt að kveðja félagið endanlega.

,,Augnablikið var mjög svekkjandi. Þetta var félagið sem ég hafði æft með fimm sinnum í viku í mörg, mörg ár og ég spilaði minn fyrsta leik þarna,“ sagði Garner.

,,Ég vildi í raun ekki halda áfram hjá félaginu og þegar þeir sögðu mér að ég mætti fara þá samþykkti ég það. Það var vit í þessu. Ég átti tvö góð tímabil annars staðar á láni og sneri svo aftur til Man Utd.“

,,Ég þekki sjálfan mig og ég veit að ég hefði ekki fengið að spila ef ég hefði verið áfram. Ég vissi að það væri fullkomið fyrir mig, 21 árs gamlan, að færa mig um set og reyna að finna nýtt heimili sem ég er nú með í Everton.“

,,Ég vildi ekki bara vera einhver aukaleikari á æfingum. Á síðustu leiktíð var ég einn mikilvægasti leikmaður Nottingham Forest og það er sá leikmaður sem ég vil vera.“