Það er óhætt að segja að nýjasta bók glæpasagnadrottningarinnar Yrsu Sigurðardóttur, Gættu þinna handa, hafi ekki fengið einróma lof hjá gagnrýnendum Kiljunnar í þættinum sem sýndur var á RÚV gær.
„Þetta er ekki neitt svakalega vel heppnuð bók finnst mér,“ segir Þorgeir Tryggvason, gagnrýnandi Kiljunnar, þegar talið berst að bókinni. Þorgeir útskýrir þessa afstöðu sína svo nánar: „Aðallega bara vegna þess að þessi hópur er svakalega óskýrt teiknaður, hann er mjög keyrður á klisjum. Þú veist, það er spjátrungurinn, það er fyllibyttan, það er freka stelpan og þögla stelpan. Þetta verður ekki alveg nógu… mann langar ekki nógu mikið að vita hvað eiginlega gerðist.“
Þorgeir segir þá að fléttan sjálf í bókinni sé mjög „Yrsu-leg“ og mjög flókin. „Það er engin leið að komast einhvern veginn til botns í því hvað gerist. Sumt skilur maður bara ekki fyrr en á síðustu blaðsíðunum,“ segir hann en Egill Helgason, þáttastjórnandi Kiljunnar, segir þá að það sé nú eins og það eigi að vera. „Já, já, ég býst við því að það muni gleðja marga. En það er erfitt að komast þannig inn í hana að maður láti sig það einhverju varða,“ segir Þorgeir við því.
Kolbrún Bergþórsdóttir, sem einnig er gagnrýnandi í þættinum, var heldur ekki hrifin af bókinni. „Já, hún verður aldrei verulega spennandi,“ segir hún.
„Hins vegar fannst mér hún forvitnileg af því maður veit ekkert hvað er að gerast. Það dúkkar þarna upp lík og þau eru að dröslast með lík, maður hugsar: „Bíddu, hvað er eiginlega á seyði? Hvað er að gerast?“ Hún hélt mér alveg gangandi á þeirri forvitni, svo fannst mér líka samskipti Iðunnar við hálfsystur sína, sem hún þolir ekki, mjög skemmtileg og smá kómísk.“
En Kolbrún var ekki ánægð með útskýringar Yrsu á því sem var í gangi. „Svo kemur að því að útskýra fyrir manni hvernig á öllu þessu standi, þá verður sagan mjög ótrúverðug og eiginlega beinlínis kjánaleg. Þannig þú situr hérna andspænis frekar súrri manneskju, ég er ekki glöð,“ segir hún.
„Þú vilt meina að Yrsa hafi gert betur og geti gert betur?“ spyr Egill þá Kolbrúnu. „Já, já, já, hún á að gera miklu betur. Ég bara skil ekki hvað hún var að hugsa þarna. En eftir ár, þetta hlýtur að vera betra eftir ár.“
