Margir hafa líklega lent í því að vakna dauðþreyttir og að hafa vonast til að enn væru margir klukkutímar þar til vekjaraklukkan ætti að hringja. En oft er það svo, þegar þetta gerist, að aðeins eru nokkrar mínútur í að klukkan hringi.

Margir hafa eflaust furðað sig á af hverju þetta gerist? Af hverju maður vaknar rétt áður en klukkan hringir.

Eftir því sem segir í umfjöllun LADbible um þetta þá er góð vísindaleg skýring á þessu. Hana er að finna í taugum sem nefnast nucleus suprachiasmaticus (SCN) en þær eru í undirstúkunni í fremsta hluta miðheilans.

Að sögn Videnskab þá eru þessar taugar aðallífræðilega „úrið“ hjá spendýrum og við mennirnir tilheyrum einmitt þeim hópi.

SCN stýrir blóðþrýstingi, líkamshita og hvernig við upplifum tímann. Þessar taugar stýra því í raun hvenær maður finnur fyrir þreytu og hvenær manni finnst maður vera ferskur. Þetta er því sökudólgurinn þegar þér finnst þú of þreytt/ur til að vakna á morgnana.

SNC reynir að vekja þig þegar þú átt að vera orðin frísk/ur en ástæðan fyrir að maður vaknar stundum rétt áður en vekjaraklukkan hringir er að þrátt fyrir að maður sé kannski ekki mjög frískur þá reyna þessar taugar að halda þeirri rútínu sem maður er í.

Af þessum sökum mun fólk, sem fer venjulega í háttinn á sama tíma og á fætur á sama tíma dag hvern, oftar vakna rétt áður en vekjaraklukkan hringir en þeir sem fara í háttinn á óreglulegum tímum og á fætur á mismunandi tímum frá degi til dags.

Ástæðan er að þegar líkaminn er í fastri rútínu getur hann sjálfur stillt svefnprótínið PER rétt en það gerir að verkum að okkur finnst við vera þreytt á réttum tíma á kvöldin og frísk á réttum tíma á morgnana.

Lykillinn að góðum nætursvefni og að geta vaknað án vekjaraklukku, en alltaf á sama tíma, er sem sagt að fara nær alltaf í háttinn á sama tíma og á fætur á nokkurn veginn sama tíma.