Í sjónvarpsþættinum Matur og heimili á Hringbrautar í kvöld heimsækir Sjöfn Þórðar Tönju Maren Kristinsdóttur fagurkera með meiru og eiganda vefverslunarinnar Myrkstore. Tanja fékk til liðs við sig Stellu Birgisdóttur innanhússhönnuð hjá Béton studio til að endurhanna heimili sitt að innan á fallegan og stílhreinan hátt með upprunalegan arkitektúr að leiðarljósi.

Húsið hennar Tönju er byggt árið 1946 er staðsett á fallegu grónu svæði þar sem veðursæld ríkir í Sundunum. Tanja og maðurinn hennar fluttu inn í nóvember í fyrra og langaði til að færa stílinn til nútímans og huga um leið að upprunalegum arkitektúr. Stella Birgisdóttir sá um alla innanhússhönnunina í samráði við Tönju þar sem minimalískur stíll og hlýleiki er í fyrirrúmi.

Hannað kringum eyjuna

Eitt af verkefnunum að var að útbúa draumaeldhúsið fyrir húsráðendur en Tanja vildi hafa eyju og fannst það skipta miklu máli. „Skipulagið var hannað í kringum eyjuna, en húsráðendur vildu hafa rúmgóða eyjuna sem myndi nýtast sem borð og vinnuaðstaða við matargerð,“ segir Stella og bætir við að þetta hafa verið einstaklega skemmtilegt verkefni með Tönju og hennar manni. „Samstarfið hefur verið alveg frábært og góð vinátta hefur orðið á milli okkar.“

„Ég fékk Stellu líka til að hanna barnaherbergið með mér, en við eigum árs gamlan son og mig langaði til að vera með fallegt barnaherbergi þar sem hlutirnir hans fengju að njóta sín“ segir Tanja.

Missið ekki af lifandi og skemmtilegri heimsókn Sjafnar til Tönju og Stellu í þættinum Matur og Heimili á Hringbraut í kvöld klukkan 19.00 og aftur klukkan 21.00.

Brot úr þætti kvöldsins má sjá hér:

Matur og heimili stikla 8. nóvember 2022