Knattspyrnusamband Íslands hefur verið gagnrýnt í dag og í gær eftir að sambandið veitti Aroni Einari Gunnarssyni sérstaka hundrað leikja-treyju, fyrir að leika hundrað A-landsleiki fyrir Íslands hönd. Dagný Brynjarsdóttir benti á þetta hafi ekki verið gert kvennamegin.
„Birkir Bjarna fékk treyju eftir sinn leik í sept ’21… Aron Einar fékk treyju eftir sinn leik í dag… Við Glódís Perla erum enn að bíða eftir okkar hundrað leikja treyju síðan í apríl!!! Litlu hlutirnir í þessari blessuðu baráttu alla daga,“ skrifaði Dagný á Instagram.
Margrét Lára Viðarsdóttir tók undir með Dagnýju. „Í ljósi umræðu um ,,litlu hlutina”. Ég spilaði minn síðasta landsleik 08.09.2019 eftir frekar farsælan landsliðsferil. Spilaði með öllum landsliðum Íslands frá 14 ára aldri, semsagt 18 ár!!!! Ég hef ALDREI verið kvödd né fengið tækifæri til að þakka stuðningsmönnum landsliðsins fyrir mig. Ætli sé verið að bíða eftir að ég taki fram skóna aftur??“
Klara Bjartmarz, framkvæmdarstjóri KSÍ, segir sérhannaða treyju vera frumkvæði A-landsliðs karla. Þó sé fullt tilefni sé að koma á þeirri tækifærisgjöf kvennamegin líka.
„Formaður KSÍ, Vanda Sigurgeirsdóttir fór til Serbíu í apríl fyrr á þessu ári þar sem Dagný og Glódís voru heiðraðar fyrir þeirra 100 landsleik. Þar fengu þær afhentan blómvönd fyrir leikinn. Síðan munu þessir leikmenn, líkt og venjan er, fá málverk frá KSÍ. Það verður afhent á næsta ársþingi KSÍ eins og við reynum að gera alltaf,“ segir Klara við Fréttablaðið.
Klara ræðir málið nánar við Fréttablaðið.
