Mikael Nikulásson, sparkspekingur í Þungavigtinni, var harðorður í þættinum sem birtist fyrir helgi og í garð varnarmannsins Brynjars Inga Bjarnasonar.

Brynjar Ingi hefur verið orðaður við endurkomu til Íslands eftir að hafa farið í atvinnumennsku í fyrra en þar hefur gengið illa.

Brynjar spilaði með Lecce á Ítalíu um tíma áður en hann hélt til Valerenga en tækifærin í Noregi eru af skornum skammti.

Mikael telur að það sé ekki ásættanlegt að Brynjar snúi aftur heim svo snemma ef hann vilji ná árangri sem a tvinnumaður.

Brynjar lék áður með KA hér heima og á að baki 14 landsleiki fyrir Ísland.

,,Lecce er í efstu deild á Ítalíu og Brynjar Ingi var of lítill fyrir Lecce, það er ekki AC Milan eða Inter en hann átti ekki að fara í Lecce,“ sagði Mikael í þættinum.

,,Svona lið er alltaf með fjóra eða fimm hafsenta, Þórir Jóhann er í liðinu inni á milli og hefur komið á óvart en hann er samt inni og út úr liðinu sem er allt í lagi í ítölsku A deildinni. Hann hefur kannski fimm stöður til að fara í sem er öðruvísi.“

,,Þetta var of stórt verkefni á sínum tíma en þetta virkar ekki þannig að þú spilar ekki í 3-4 mánuði og þá ertu kominn heim, til hvers ertu þá að fara út? Þetta er harður heimur, atvinnumennskan þó að við þekkjum það ekki við þrír en við gerum okkur grein fyrir því. Það er fullt af leikmönnum þarna í sömu stöðu og hann.“

,,Það er þægilegt að koma heim í KA en þannig virkar það ekki. Því miður hefur það gerst of mikið hjá íslenskum strákum. Hann er að verða 24 ára gamall og þá virkar ekkert að vera að koma heim því hann er varamaður í einhverjum leikjum.“