Samskiptin stóðu yfir um langt skeið – Ekki eina dæmið
Sveinn Andri Sveinsson hæstaréttarlögmaður bauð ólögráða stúlku að sötra hvítvín með sér í heitum potti. Þetta er meðal þess sem kemur fram í umfjöllun Stundarinnar sem birtir meðal annars samskipti hans við ungar stúlkur.
Í umfjöllun Stundarinnar er meðal annars rætt við ungar stúlkur sem hafa reynslu af samskiptum við Svein Andra og birt meðal annars afrit af samskiptum hans við sextán ára stúlku. Umrædd samskipti stóðu yfir í um tvö ár og mátti Sveini vera ljóst að stúlkan væri undir lögaldri en þó boðið henni í heitan pott að drekka áfengi.
Sem fyrr segir stóðu samskiptin yfir um langt skeið. Á einum tímapunkti, þegar stúlkan er 16 ára, spyr hann stúlkuna hvort þau ættu ekki að stefna á hitting fljótlega. „Væri snilld að eiga kósístund í pottinum og sötra hvítvín sætust af öllum.“ Umrædd samskipti hófust árið 2011 þegar stúlkan var enn 16 ára og koma meðal annars bílpróf og nám stúlkunnar í menntaskóla til tals.
Í skilaboðum milli stúlkunnar og Sveins um ári síðar spyr Sveinn stúlkuna meðal annars að því hvort hún sé farin að keyra. Hún svarar að bragði að hún fái bílprófið á morgun og svarar Sveinn að það væri þá „allt í lagi að skjótast í Fróðaþingið“ áður en hann segir að hún sé „ómótstæðileg“.
Áður hefur verið fjallað um samskipti Sveins við aðra stúlku, Rebekku Rósinberg sem var sextán ára þegar hún kynntist Sveini Andra. Í viðtali við DV árið 2014 kom fram að Rebekka hefði orðið ólétt sextán ára gömul og að Sveinn Andri væri faðir barnsins. Eftir að viðtalið birtist kom fram að Sveinn hefði ákveðið að stefna DV vegna viðtalsins og krafðist hann tíu milljóna króna
Rebekka rifjaði í viðtalinu upp fyrstu kynni þeirra Sveins Andra sem áttu sér stað í gegnum samskiptasíðuna Facebook. „Ég „addaði“ honum á Facebook því ég var að fylgjast með þessu DNA-dóti hjá honum og Kristrúnu Ösp. Okkur vinkonunum fannst þetta fyndið,“ sagði Rebekka og vísaði í umfjöllun fjölmiðla þegar önnur barnsmóðir Sveins Andra varð ólétt. Mikið var fjallað um það að tveir kæmu til greina sem faðir barnsins. Rebekka sagði að þeim vinkonunum hefði fundist skemmtilegt að fylgjast með og því hafi hún bætt honum á vinalista sinn á Facebook. „Svona eins og unglingar gera, „adda“ einhverjum frægum hjá sér,“ sagði hún og bætti við:
„Síðan kemur hann stuttu seinna upp á „chattinu“ hjá mér og segir „Hæ sæta.“ Vinkona mín var hjá mér og okkur fannst svo fyndið að hann væri að segja þetta að við fórum að tala við hann. Síðan þróaðist þetta eitthvað og hann fær númerið hjá mér,“ sagði hún. Samskiptin urðu meiri og þau töluðu saman í síma. „Okkur fannst þetta mjög fyndið fyrst að svona gamall karl væri að tala við mig. Ég sagði honum strax hvað ég væri gömul en þarna var ég nýorðin 16 ára. Hann vissi allan tímann hvað ég væri gömul,“ fullyrti Rebekka sem varð svo barnshafandi í kjölfarið.
Í umfjöllun Stundarinnar í október í fyrra kom fram að DNA-próf hefði leitt í ljós að Sveinn Andri væri barnsfaðir Rebekku.
