Maður sem sakfelldur var fyrir ofbeldi gegn dætrum sínum fyrir héraðsdómi og áfrýjaði dómnum yfir sér til Landsréttar skal sitja í gæsluvarðhaldi þar til endanlegur dómur í máli hans liggur fyrir en þó ekki lengur en til 16. desember. Á föstudag staðfesti Landsréttur svofelldan úrskurð héraðsdóms í máli mannsins.

Dómur var kveðinn upp fyrir manninum í janúar og fékk hann eins og hálfs árs fangelsi. Þeim dómi áfrýjaði hann til  Landsréttar, eins og áður segir, og bíður nú endanlegrar niðurstöðu í sínu máli. Hvorki ákæruvaldið né dómstólar vilja að hann gangi laus á meðan hann bíður endanlegs dóms, vegna þess að ástæða sé til að ætla að hann haldi áfram ofbeldisbrotum gegn dætrum sínum. Kúgaði hann dætur sínar til hlýðni með ógnandi hegðun og voru brotin gegn börnunum sögð hafa staðið yfir í mjög langan tíma.

Var hann sakfelldur fyrir stórfelld brot gegn fjórum dætrum sínum, líkamlegt og andlegt, auk þess að hafa hafa brotið gegn þeim með umsáturseinelti, móðgandi og smánandi skilaboðum og hótunum eftir að þær voru vistaðar utan heimilis. Hann var einnig sakfelldur fyrir andlegt og líkamlegt ofbeldi gegn fyrrverandi eiginkonu sinni.

Úrskurði Landsréttar og héraðsdóms í málinu má lesa hér