Musk greiðir 44 milljarða dollara fyrir hlutabréfin í fyrirtækinu. Hann hafði staðið í mánaðarlöngum deilum við stjórnendur þess um fjölda falskra aðganga og fullyrðingar uppljóstrara að stjórnendur Twitter hefðu blekkt eftirlitsaðila hvað varðar öryggishættur sem steðja að miðlinum.
Sky News segir að fyrsta verk Musk, eftir að gengið var frá kaupum hans á Twitter, hafi verið að reka alla æðstu yfirmenn fyrirtækisins en hann sakar þá um að hafa blekkt hann varðandi fjölda falskra aðganga á miðlinum.
Hann rak Parag Agrawal, forstjóra, Ned Segal, fjármálastjóra, og Vijaya Gadde, yfirmann lögfræðisviðs, að því er fregnir herma. Sky News segir að fregnir hafi borist af því að Agrawal og Segal hafi verið í höfuðstöðvum Twitter í San Francisco þegar gengið var frá samningnum og hafi þeim strax verið fylgt út úr byggingunni.
Musk birti að sjálfsögðu færslu á Twitter eftir að gengið var frá kaupunum og sagði: „the bird is freed“ (fuglinn er frelsaður) og á þar við að gengið hafi verið frá kaupunum.
Musk segist ekki hafa keypt Twitter til að græða heldur til að „hjálpa mannkyninu, sem ég elska“.
Hann segist vilja sigrast á fölskum aðgöngum á Twitter sem moka út færslum, opinbera algóriþmana sem ákveða hvaða efni birtist notendum og koma í veg fyrir að miðillinn verði bergmálshellir haturs og sundurlyndis en um leið ætlar hann að halda ritskoðun í lágmarki.
Hann hefur ekki skýrt frá hvernig hann ætlar að ná þessum markmiðum eða hver muni stýra fyrirtækinu. Hann hefur gefið í skyn að hann muni fækka starfsmönnum en um 7.500 manns starfa hjá Twitter. Áður hefur komið fram að hann hafi sagst vonast til að geta fækkað þeim um þriðjung.
Margir óttast að hatursræða og ólöglegt efni muni færast í vöxt á Twitter því Musk hefur í hyggju að skera niður í eftirliti með innihaldinu á miðlinum. Hann hefur oft rætt um trú sína á „algjöru tjáningarfrelsi“ og gefið í skyn að hann muni leyfa fólki, sem hefur verið útilokað frá Twitter, að snúa aftur. Þeirra á meðal er Donald Trump, fyrrum forseti Bandaríkjanna.
