En á síðustu vikum hafa hlutirnir breyst. Mörg hundruð þúsund karlmenn hafa flúið land til að forðast að verða kallaðir í herinn. Byrjað er að gagnrýna stríðið á ríkissjónvarpsstöðvum landsins. Orðrómar eru um óróa meðal þeirra sem teljast til innsta hrings Pútíns.
Norska ríkisútvarpið (NRK) segir að samkvæmt heimildum frá rússneskum stjórnarandstæðingum þá ríki mikil svartsýni í Kreml.
Það sem hefur haft mest áhrif innanlands er herkvaðningin sem Pútín tilkynnti um 21. september. Sergei Guriev, rússneskur hagfræðingur og prófessor búsettur í París, segir að herkvaðningin hafi veikt Pútín mikið. Í samtali við NRK sagði hann að Pútín hafi reynt að forðast herkvaðningu eins lengi og hann gat, það að hann hafi þurft að grípa til hennar sýni að staða hans sé veik, bæði pólitískt og hernaðarlega.
NRK ræddi við rússneska konu, Natasja, sem býr í Murmansk. Hún sagði að „stríðið sé komið heim til allra Rússa“. „Í öllum fjölskyldum eru karlar. Allir geta verið kvaddir í herinn. Allar fjölskyldur þekkja einhvern sem hefur verið kvaddur í herinn eða hefur flúið. Opinberlega heitir þetta enn sérstök hernaðaraðgerð en heima í eldhúsinu heitir þetta stríð,“ sagði hún.
Guriev sagði að enn sem komið er hafi Pútín leyft gagnrýnisröddum úr innsta hring sínum að heyrast, þær hafi sama markmið og hann, að eyðileggja Úkraínu en vilja ganga enn lengra. „Pútín veit ekki hvað hann á að gera við gagnrýnendurna. Þetta er stór vandi fyrir hann. Á einhverjum tímapunkti verður hann að þagga niður í þeim,“ sagði hann.
Hann sagði að það að órói ríki í innsta hring Pútíns þýði ekki að fólk þar vilji losna við hann en margir hafi orðið fyrir vonbrigðum. „Þeir vilja vinna stríðið. Nú eru þeir að tapa. Það mun hafa afleiðingar,“ sagði hann.
