Stjarnan hefur staðfest endurkomu Heiðars Ægissonar til félagsins en hann kemur frítt frá Val.

Þessi fjölhæfi leikmaður ákvað fyrir ári síðan að fara frá Stjörnuna og gekk í raðir Vals. Hann fékk samningi sínum þar rift á dögunum.



“Það er ánægjulegt að fá Heiðar aftur heim eftir stutt stopp á Hlíðarenda en eins og allir vita hefur hann staðið sig með sóma hjá okkur í gegnum tíðina og það er ljóst að hann hefur mikinn áhuga á því að taka þátt í þeirri uppbyggingu sem er nú þegar hafin og eftir samtöl við hann undanfarna daga er ljóst að hungrið til að gera vel er sannarlega til staðar sem fellur vel að þeim kúltúr sem við erum að byggja upp innan félagsins. Það eru spennandi tímar framundan hjá okkur í Garðabænum”, segir Helgi Hrannarr, formaður mfl. ráðs karla

“Ég er mættur heim og er ótrúlega ánægður með að hafa náð samkomulagi um að spila aftur með uppeldisfélagi mínu. Stjarnan er með mjög spennandi leikmenn innan sinnar raða, eina flottustu aðstöðu landsins og gott teymi í kringum sig. Mikil uppbygging hefur átt sér stað og góður grunnur myndast í kjölfarið. Það sést best inná vellinum þar sem margir ungir og efnilegir leikmenn hafa fengið tækifærið og nýtt það vel. Ég hlakka mikið til að fá tækifæri til að spila með þeim og gefa þeim góð ráð. Ég á frábærar minningar héðan og er ég gífurlega spenntur að búa til fleiri með bestu stuðningsmönnum landsins. Ég hef mikla trú á þessu verkefni sem er framundan, að koma Stjörnunni aftur í fremstu röð. Skíni Stjarnan! ”, segir Heiðar Ægisson