Rishi Sunak, fyrrverandi fjármálaráðherra Bretlands, hefur lýst því yfir að hann hyggist bjóða sig fram sem leiðtoga breska Íhaldsflokksins og þar með embætti forsætisráðherra Bretlands. Þetta tilkynnti Sunak í færslu á Twitter nú fyrir hádegi.
The United Kingdom is a great country but we face a profound economic crisis.
That’s why I am standing to be Leader of the Conservative Party and your next Prime Minister.
I want to fix our economy, unite our Party and deliver for our country. pic.twitter.com/BppG9CytAK
— Rishi Sunak (@RishiSunak) October 23, 2022
Segir Sunak að Bretlandi standi frammi fyrir alvarlegri efnahagskreppu og hann vilji laga efnahag landsins og leggja sitt lóð á vogaskálirnar. Framboð Sunak kemur fæstum á óvart enda nýtur hann stuðnings yfir 100 þingmanna flokksins sem er nauðsynlegt til þess að frambjóðandi sé gjaldgengur.
Boris Johnson, fyrrverandi forsætisráðherra Bretlands, er talinn vera helsti keppinautur Sunak um embættið. Aðeins eru tæpir fjórir mánuðir síðan að Johnson sagði af sér sem forsætisráðherra landsins og mögulegt framboð hans því skýrt dæmi um að hlutirnir eru fljótir að breytast í pólitík.
Breskir fjölmiðlar greina frá því að Sunak og Johnson hafi fundað í gær í margar klukkustundir en hvorugur hefur gefið neitt upp um fundarefnið. Opinberlega er talið að Johnson njóti stuðnings ríflega 50 þingmanna Íhaldsflokksins til endurkjörs en hann hefur sjálfur fullyrt að hann hafi þegar tryggt sér nægilegan fjölda þingmanna til að bjóða sig fram.
Margir sérfræðingar telja að hörð kosningabarátta milli Sunak og Johnson geti sundrað Íhaldsflokknum en margir stuðningsmenn Johnson telja að Sunak beri mikla ábyrgð á falli hans með því að segja af sér ráðherraembætti undir lok forsætisráðherratíðar Johnson. Eru líkur á því að keppinautarnir séu meðvitaðir um þessa hættu og því hafi fundurinn í gær verið tilraun til þess að landa einhverskonar samkomulagi um framhaldið.
